英國生活，一點都不容易啊（吐煙）
跟所有來了英國幾年的人一樣。我也興奮過，努力過，頹廢過，低潮過，憤怒過。這是我來了4年半經歷過的事：
交稅交到想直接交條命出嚟，一度懷疑自己點解要咁努力
NHS睇醫生可以說是免費的，但每次辨Visa首先交每年400鎊Immigration Health Surcharge（BNO應該不用？），你說是免費，我說Pre pay。再來，首先你未病死之前，幸運的話可以接通診所電話 （我形容為打演唱會電話，因為8點要開始打，會經歷嘟嘟嘟唔通，或者通左但突然Cut線）幸運接通了，留電話等醫生打番比你telephone consultation，確定你非要面診不可，先會預約時間見你。你話睇醫生免費，我話你未病死前睇到醫生就免費。
仲要見到醫生唔可以問太多問題，我有次問左幾個問題，佢話超時，叫我再Book過時間約見。又有次病到極辛苦，係電話到求醫生見我，當日答應會診，我開心到要流淚了。噢，藥是要另外付錢的。
住南邊樓價高，住北邊大風到暈，住西邊落雨落到痴線
你話，落雨有咩大不了。少年你太天真了，先不說無間斷的落雨好影響心情，當你以為天晴的日子，中間也總會落1-2個鐘頭雨。我笑著說英國沒有Have a Nice Day, 只有Have a Nice Moment，但心在趟淚。
如果你有車，除了影響心情，又真係好似無乜大不了。如果唔識揸車，或者無車，真係每天經歷來回地獄又折返人間。
講起學車，又是另一場血淚史。英國揸棍波車仍然係主流。在鄉郊地方，我的學車師傅告訴我，全湖區只有1-2位私人師傅教自動波。作為一個路痴，經歷了3年斷斷續續、差不多100小時的棍波車練習，教官告訴我Pass了的瞬間我差點就噴淚了。終於不用在雨中狼狽地漫步，重新獲得一雙腿自由走動，我學會了感恩。
還有大大小小數不盡的狗血之事，例如我明明唔睇BBC，但只要你擁有一台電視，你得交電視稅。例如問咗Home office都可以申請錯Visa，留頭一年要畀錢睇NHS。又例如明明問咗話唔駛報稅，但2年後會寄信嚟話你唔報稅，罰你1300鎊（後來有畀番我啦）。又例如買樓申請按揭，交哂文件先同你講Sorry無銀行接受港幣出糧，麻煩籌夠2成首期。又例如租屋擲爛咗架車，保險不肯賠，業主拍拍屁股說噢不關我事喔，是天氣不好令我間屋擲爛你架車，你地硬食整車錢＋保險加價啦吹得我脹呀bye～
經過數之不盡的懷疑人生時刻，除了練訓成金剛不壞煮到埋黎就硬食之身。更重要的是，明白到來到別人的國家，就要守這裹的遊戲規則。英國的制度，到底還是公平的（比起你知道是誰的國家）。
不是說不要來，但如果你抱著一種英國人欠了你英籍的高人一等態度、或是一心來走捷徑/攞福利，你注定會失望，因為你會被無數次的生活小細節打敗，小至天氣、交通、語言文化，到英國人的處事方式，都會是無止境的嘗試與沮喪。如果你想來避開藍屍，更加對不起，英國的唐人藍屍定必比你想像的還要多。
你得到的，是自由的氣息，是學習的機會，是一場冒險之旅。
以上的，只是我一粒小薯的經歷，有更多人比我幸運、也有更多人比我更崩潰。說到底，每個人的練歷、人際和遭遇都不一樣。只能說一本BNO能幫你來英國定居，但不能輕易幫你租屋買樓甚至搵工。記著英國也正經歷經濟寒冬。當地人失業率大增，業主、銀行變得更小心翼翼。而你，也會比你在香港時更孤立無援。
問心，覺得有能力的可以來闖闖；只想過來攞福利的，你會過得更辛苦。
留下來或離開都需要無比勇力，只有決定了，就要抱著一種頭也不回的心態，來英國重新學做人。
Welcome to your new life（抱抱）
－－－－－－－－－－－－－－－－－－－
👊 來找我玩
IG: instagr.am/misswinterinuk
－－－－－－－－－－－－－－－－－－－－－－－－－
🇬🇧英國租房子全攻略
https://bit.ly/2ArN0PX
🇬🇧英國10大奇芭 ：
最常讀錯的英國地方名: goo.gl/FUyLyo
冬天遊英國要知的事: goo.gl/QdkAgb
遊英國要知道的禮儀: goo.gl/3FeLUL
英國人常用的英式俚語: https://bit.ly/3dTQad6
Search